Бағдарлама сипаттамасы
AI Sana бағдарламасы — 2024 жылғы желтоқсанда Қазақстан Республикасының Президенті Қасым-Жомарт Тоқаевтың және Ғылым және жоғары білім министрлігінің тапсырмасымен іске қосылған ауқымды мемлекеттік бастама. Оның басты мақсаты — жоғары білікті кадрларды даярлау және жасанды интеллектінің ұлттық экожүйесін дамыту.
Бағдарлама 650 мың студентті қамтуды көздейді және кезең-кезеңімен жүзеге асырылады. Ол студенттерге, магистранттарға, докторанттарға, постдокторанттарға және жас зерттеушілерге әртүрлі салаларда (ауыл шаруашылығы, су ресурстары, энергетика, білім беру және т.б.) жасанды интеллект пен AI-кәсіпкерлік саласында қосымша құзыреттер алуға мүмкіндік береді. Бұл болашақ мамандарға өз кәсіби саласын терең түсінумен қатар, жұмыс үдерістерін оңтайландыру және өзекті салалық міндеттерді шешу үшін жасанды интеллект технологияларын тиімді қолдануға жол ашады.
Бағдарлама түлектері өз стартаптарын іске қосып, салалық мәселелерге инновациялық шешімдер ұсына алады немесе алған білімдерін кәсіби қызметінде қолданып, озық технологияларды енгізуге және елдің технологиялық дамуын жеделдетуге үлес қосады.